२०८३ बैशाख २, बुधबार ०६:४२
जनकपुरधाममा एक घरमा पकाइएको मासुलाई लिएर फैलिएको हल्लापछि स्थानीय अवस्था केही समय तनावपूर्ण बनेको छ ।
जनकपुरधाम–१६ स्थित पुलचोक क्षेत्रमा उक्त घटना भएपछि सामाजिक सद्भावमा असर पर्ने चिन्ता बढेको हो । गत चैत २९ गते साँझ मुस्लिम समुदायका मोहम्मद अली साफी आफ्नै घरमा मासु पकाइरहेका बेला केही स्थानीय युवाहरूले गाईको मासु भएको आशंका गर्दै उक्त मासु नियन्त्रणमा लिएर प्रहरीलाई बुझाएका थिए ।
त्यसपछि घटनाले चर्चा पाउँदै जाँदा क्षेत्रको वातावरण संवेदनशील बन्न पुगेको बताइएको छ । जिल्ला प्रहरी कार्यालय धनुषा ले घटनाप्रति गम्भीर ध्यान दिँदै सर्वसाधारणलाई अफवाहमा नपर्न र संयमता अपनाउन आग्रह गरेको छ ।
सामाजिक सञ्जालमा फैलिएका अपुष्ट जानकारी र भ्रामक टिप्पणीहरूले समुदायबीच अविश्वास बढाउन सक्ने भन्दै प्रहरीले सचेत गराएको हो । प्रहरीका अनुसार घटनास्थलबाट बरामद गरिएको काँचो तथा पकाएको मासु परीक्षणका लागि विधिविज्ञान प्रयोगशाला सामाखुशी पठाइएको छ ।
परीक्षण प्रतिवेदन आएपछि मात्र मासुको वास्तविक प्रकृति पुष्टि हुने बताइएको छ । मधुसुधन न्यौपाने ले हालसम्म उक्त मासु कुन जनावरको हो भन्ने पुष्टि नभएको स्पष्ट पार्दै प्रतिवेदन आउनुअघि नै सामाजिक सञ्जालमा आधारहीन दाबी गर्नु गैरजिम्मेवार कार्य भएको बताएका छन् ।
यस्ता गतिविधिले धार्मिक तथा साम्प्रदायिक सद्भावमा नकारात्मक असर पार्न सक्ने उनको भनाइ छ । उनका अनुसार यदि परीक्षणपछि निषेधित जनावरको मासु भएको प्रमाणित भए कानुनअनुसार कारबाही गरिनेछ । तर, त्यसअघि अनावश्यक अफवाह फैलाएर सामाजिक एकता बिगार्ने प्रयास नगर्न सबैलाई आग्रह गरिएको छ ।
